إبن الفقريه
=====
فكة 100 فكة 100
نفسى فى طرشى مع طعميه
نفسى فى لحمه أوملوخيه
أومحشى وفرخه مشويه
رحت المطعم قلت له 100
قاللى روح يابن الفقريه
دى توديها لعمى عطيه
يديك بيها لبوس فى الليه
ولا تاخدها لخالتى سنيه
تعمل لك بيها العمليه
خدت 200 من عمى حسين
قلت هاصيف فى العلمين
وآخد كده شهرين تسليه
رحت قالولى هات عسليه
واتغندر لك مع سحليه
دا أنت ياواد لازمك تعزيه
بعت الدار وجاموستى زكيه
لاجل أتنطق فى العالميه
قلت أسافر بره شويه
واركب طياره جويه
تيجى مضيفه اعاكسها شويه
سوده عيونها أوعسليه
نتجوز والعيشه هنيه
وأخدها لباريس وإيطاليا
جات صحتنى بجردل ميه
قالت قوم يابن الفقريه
عمال بتشخر بأذيه
قوم هات لنا طرشى وطعميه
قلت لها إختشى بقى ياوليه
والله شكلك زى عطيه
=====
بقلمى سامح توكل أبوالسبح
ليست هناك تعليقات:
إرسال تعليق