الجلالة /كلمات الشاعر /يوسف التجاني

؛؛؛؛؛؛؛  الجّْلالة ؛؛؛؛؛؛؛

مَرْضْ الجلالة زاد قْوَا

ضُعْفْ بْصَارْنَا مْنُّو رْوَا

غْلَّة الجّْنانْ...غْلَا وْ كْوَا

الْكْلْبْ تْبَرّْمْ الذِّيبْ تْقَوَّا

الْعْبَرْ بْالْوْفَا وِيْقُول سْوَا سْوَا

التسليييم أيا بَّا ساسا

وْجَهْ الشِّيخْ قاسَحْ مْهَنّْدْ

ف الْخَيْمَة ليلْ وْنْهار يْهدْ

ف العوافي يْنفَخْ وْ يْزْندْ

سْلّْف سْلّْف لْدِينُو ما يْرُدْ

والْمُرِيد مْدْلُولْ يْبُوسْ الْيْدْ

أَفِيييقُو يا النَّعَّاسا

اطْعَمْ الْحْبَابْ والْحْوَاشِي

وْحْدِي راسك مْن الْغَاشِي

ثْبّتْ الْوْتُودا ف الْغْرَاسِي

جْمَعْ جْمَعْ راسِي يا راسِي

ؤُ لْهِي الْغَافْلينْ بالتّْواشي

أَفِييينْكُوم أَلْعَسَّاسا

لْحَامْكُوم فْسْد وْعٓطا الرِّيحة

نْنْعَاسْ ونْفِيقْ عْلى فْضِيحَة

كْلَامْ الْعَار يْتْقال بالتّْبْجِيحة

يْنهبُو ف الْمال بالتّْسنْطِيحة

لِّي قال حَقِّي عْطِيه طْرِيحة

قانْعِييبن يا الْخمَّاسا

نُوضْ شْلّْلْ بالْمَا دْ الْبِيرْ

طْيَّرْ الْكَْلْبة وحَضَّر الضَّمير

شْمَّرْ وْتْمَّر راه الْحْمْل كْبير

نْسَا راسْكْ ؤُ فكَّر ف الصّْغِير

واش مابقا حَدْ عْلى بْلَادُو يْغِيرْ

الْعْفُووو  يا عبَّادين الْكْراسا

✍️ يوسف التجاني