انواع الكلمة السبعة
بقلم ..مرقص اقلاديوس
...........
كلمة تكسب القلوب
توصل قلقان للبر.
و تخلى واحد غضبان يهدا.
و تخلى واحد يبطل قر.
و تبين لشكاك بينة
و ترحمه من الكر و الفر..
و تكسب للخير ناس
و تحرر من الشر.
و كلمة تخسر القلوب
تقلق انسان.
و تخلى واحد هادى يغضب.
و ممكن تجيب لواحد الجنان.
و تخلى المتأكد يشك
أصل صناعة الشك
فن يا فنان.
و ممكن تدخل واحد
سكة الشر فجأة
من غير سابق معرفة
من غير استئذان.
و كلمة تكسر القلوب
و ربنا يرحمنا بقا
من كسر القلوب.
الانسان بقا قاسى اوى.
يقول الكلمة.
آسف يحدف الكلمة
تقولشى بيحدف طوب.
يتريق و يهين
و يتهم و يجرح
يمكن لواحد
عمل غلطة صغيرة يا دوب.
و اللى يغيظك بأه
إن الباشا اللى رايح جاى
يعدل على الخلق
هوا نفسه كله عيوب.
و كلمة تنور العقول
مواضيعها كتيرة
واحد كلمته علم
و واحد كلمته فن.
تبقى كلمته بسيطة
تنتشر و تبقى كبيرة.
يعلم الناس
ازاى تفكر و تنقد و تبدع
اصل الحياة يا صاحبى
بقت صعبة
قول عسيرة.
و يا ريت بس كدة
دى كمان قصيرة.
و كلمة تضلم العقول
ربنا ادانا حرية العقل
ليه احنا نسجن نفسنا.
معضلة.
امبارح اللى عدا و فات
نرجعه
و ندور بفكر امبارح
على اجابات
للى جد النهاردة
من اسئلة.
و كلمة تدمر العقول
و عنها
حدث و لا حرج.
ماتت قيم
و اتولدت و كبرت قيم.
و زاد فى الدنيا
الهرج و المرج.
و اختلط الحابل بالنابل
فى الاخبار.
و يبقوا عارفين إن الخبر كاذب
و برضو يذيعوا الخبر.
وكلمة امانة ماتت.
تصدق دى الوحيدة
اللى ما جاش
عن قتلها فى الاخبار خبر.
يالا
ربنا بقا اللى عنده الفرج.
و كلمة
يرفعها اصحاب العقول
اصحاب القلوب.
للى بدع
كل العقول
و كل القلوب.
ارفع قلبك لرب القلوب.
ارفع عقلك لرب العقول.
اطلب منه و افضل اطلب.
قولله و افضل قول.
يرحمنا برحمته.
و يثبت فى عقولنا وصيته.
و يملا قلوبنا بمحبته.
عشان كلمتنا تكسب ليه
و لمحبته
و لوصيته
كل العقول
و كل القلوب.
ملاح بحور الكلمة
مرقص اقلاديوس
ليست هناك تعليقات:
إرسال تعليق