ليالي
غنوه للشاعر السيد الشهاوى
ياليالى الصيف والله وجيتى
ومن بعد غيابك هليتى
صحيتى قلبى اللى خاصمنى
ولفوق خدتينى وعليتى
الليله حبيبي بعت قاللى
مش ناسي حبى وهوايا
وحلفني باللي ملك عمري
حلفني بقلبه اللى معايا
يترجى وياريت يؤمرنى
الليله حايسهر ويايا
*****
من بين فساتيني وقفت اختار
محتاره البس انهي فيها
والحب في قلبى مشعلل نار
وحا جات كده مش قادره احكيها
والليل فى عيوني طلع له نهار
وخدودى الورد طرح فيها
وداريت عنه ملامحى بزواق
علشان ما يبانشى الشوق فيها
وليالينا من بعد فراق
رجعت لا نسيتها ولا نسيها
*****
ياساعات الهجر: اجرى وعدى
ليه واقفه كده ما بتمشيش
علمنى زماني اللى جرحني
الساعه الحلوه تروح ماتجيش
وليالى الفرح قوام تجرى
وساعات الجرح ما بتعديش
وقلوب الناس مهما تخبى
دي عيونهم ابدا ما تخبيش
وف بعد حبيبي انا ضاع عمرى
وعشانه يمكن لسه باعيش
*****
ولقيتك من قبل ميعادك
مستني هناك علي شط البحر
تحكي لي عن سر بعادك
والليل وياك دايما له سحر
ضاع الكلام بين شفايفنا
ودقات قلبي فضحت سرى
رجع لي شبابي اذاي حبك
وقدرت اذاي تملك امري
حتى الاحلام سبقتنى معاك
من فرحتى بيك سبقت عمرى
كلمات السيد الشهاوى
السيد الشهاوي
ليست هناك تعليقات:
إرسال تعليق