سماحه المؤمن .. و .. تسامح الاديان
المعنى مش واحد ولا الحروف سيان
سماحه المؤمن قمه اصول الدين
مذكوره فى التوراه مذكوره فى الانجيل
سماحه المؤمن مذكوره فى القران
معناها حسن الخلق وان البشر اخوان
والفضل بين الناس فى التقوى والاحسان
سماحه المؤمن بتخلى قلبه كبير
يقابل السيئه بالعفو والغفران
حتى ان خالفته الدين انت فى عينيه انسان
تسامح الاديان مش لاقى معنى ليه
غير ان فى زعلان والثانى حيراضيه
ونصالح الاثنين ويبوسوا على رأس بعض
يعنى تسيب لى عقيده وانا اسيب لك فرض
الدين مفيش فيه كده ولا يعرف التفريط
دى خطه من ابليس ودعوه للتفتيت
فى الدين مفيش طبطبه ولا اسيب وانت تسيب
لكن المشاركه فى وطن كفيله بالتقريب
انت وانا انسان من قبل قبل الدين
والرحمه بين الناس معجونه فى التكوين
أشعار*** محمود طنطاوى _ مصر
ليست هناك تعليقات:
إرسال تعليق