حكاية شهيد /كلمات الشاعر /حسن غازي

(( حكاية شهيد)) 

           =======

ياللي بتقتل باسم الدين..

عارف انت بتقتل مين؟..

بتقتل ابنك..بتقتل اخوك؟..

بتقتل ناس واقفين يحموك؟..

طب عرفنا نوع الدين..

اللي يقول دول ناس كافرين..

ترمي قنابل كده تقتلهم؟..

ومن اولادهم كده تحرمهم؟..

ناس بتدافع عني وعنك..

تقتل فيهم ولابيهمك؟..

يعني ضميرك كده مرتاح؟..

ولا الدين من عندك راح؟..

طب عرفنا بتقتل ليه؟..

تقابل ربك وتقول ايه؟..

غرروا بيا..ضحكوا عليا؟..

ولا اعطوني دولارات ف ايديه؟..

انت لاعندك دين ولا مله..

انت جبان وخسيس وجبله..

تحرق قلب الام ياجاهل؟..

تضرب فيه وتقول يستاهل؟..

دا قلب الام عليه ملهوف..

يرجع ليها كده ملفوف؟..

كان اولاده بيستنوه..

يرجع ليهم ويقابلوه..

اخر مره ولاده شافوه..

كان ف العيد..

جايب ليهم لبس جديد..

قضي معاهم يوم والتاني..

قال انا راجع..سينا عاوزاني..

قبل ايد امه بحنيه..

وقال لها صلي..

وقومي ادعيلي ف الفجريه..

ولاده حضنوه ولاخر مره..

قال لمراته.. 

اوعي عيالنا يطلعوا بره..

خرجت امه تبص عليه..

كانت الدنيا ضباب حواليه..

كان القلب عليه بينادي..

امتي هترجع؟..

امتي هاشوفك وسط احفادي؟..

لكن الام ياعيني عليها..

قلبها حاسس..

اخر مره تشوفه عنيها..

عدي عليه كده كام اسبوع..

عاشت امه ليالي دموع..

وفي يوم جمعه..

من اكتوبر شهر النصر..

يوم الرابع والعشرون..

وقت العصر..

خرج الشعب وكله بيجري..

طالت ايد الغدر ولادنا..

في ذكري الهجره واحتفالاتنا..

عشنا اللحظه..

وكان الحلق كله مرار..

رفعنا ايدينا..

وقلنا يارب..ارحم شهداءنا الابرار..

ورجع الابن لامه شهيد..

بكي اولاده..بكي اولاده..

وقعدوا يبوسوا هدوم العيد..

=========== حسن غازي

                        ========