حقوق النشر محفوظة
-----------؛
يرضى مين ؟
------------؛
يرضى مين...
الخراب ده كله ... يرضى مين
الدمار ده كله ... يرضى مين
يامسلمين.. يامؤمنين. . يا موحدين
ف أى شرع وأى دين ..يرضى مين
فين فلاسفة المدنية
والحرية بالملوخية
وديمقراطية بالتقلية
د القرد معرفش يعمل الفلاحة
وهى .. بترب. ..فى العجين
عارفين ليه ولا مش عارفين
عشان ببساطة مفيش طحين
الأرض بارت والمية نشفت
من خصام الطين .. يرضى مين
ملعونة حرية السلاح
ملعون الكفاح لو كان نكاح
ملعون لو يطلع علينا ف يوم صباح
واحنا .. متفرقين. . متشردين
ف الخيام نستنى إغاثة
واسمنا ف لعبة السياسة
لاجئين ... يرضى مين
ملعون اللى أفتى وخلى
الروح ما تساويش
ملعون اللى نادى
بالحرية ف قعدة حشيش
ملعون اللى خلى
القتل أكل عيش
وما يهمنيش
وملعون اللى صدق
وقال امين ... يرضى مين
ليه بلادنا تبقى جلسة
ف مؤتمر
ليه بلادنا لسلاح جديد
بقى مختبر
وأهل السياسة ..يتجمعوا
ويتلمعوا ..ويطلعوا
ع الشاشات متأثرين
حزانى ياعينى
متأسيين. .يرضى مين
سوريا لمصر هى
المدد هى الخزين
ومصر للعروبة هى الوتد
والحصن الحصين
ليه الدمع فى
عيون ولادنا صبح سجين
محتار حزين
على حاله يبكى
ولا على مرار السنين
حتى البكا بقى
صعب ع المظلومين .. يرضى مين
البكا أصبح على ضمير أمة
خدتها الغمة
والموت بقى حمى
بتحصد الملايين
يرضى مين ؟
------------؛
بقلم / عادل شعبان
ليست هناك تعليقات:
إرسال تعليق