إغتيال براءة
ليه يا أمى ختنونى
ومن سعادتى حرمونى
قدام عيونك كتفونى
ولما صرخت سكتونى
ما حاولت تمنعيهم
ولا قلتلهم يرحمونى
بسكينة باردة ذبحونى
ودمى سال قدام عيونى
ليه يا أمى دمرونى
وفى براءتى اغتالونى
ماتوجعش قلبك من صراخى ولا صوتى اللى راح من أنينى
ليه يا أمى قسيتِ قلبك
وخبيتِ وشك وسيبتيهم يعذبونى
شايفة الدموع من عنيكى سايلة
زى دمى اللى لطخ هدومى
أدينى ماشية يا أمى وكل الناس بالدموع هيودعونى
جابوا لى الثوب الأبيض بدل فستان العرس وبه هيلفلفونى
أوعى تبكى يا أمى لما تلاقيهم بيكفنونى
وجوة النعش بينيمونى
ما أنت يا أمى اللى خليتيهم يقتلونى
لما وافقتِ يختنونى
لأجل العادات وناس بلدنا ما يلوموكى وثوب العفة يلبسونى
شايفة الملايكة يا أمى بيحملونى وإلى الجنة هيوصلونى
خلاص يا أمى المولد انفض وكل واحدة راحت لحالها
ما بقاش غيرك أنت وأبويا وأخواتى اللى بدعاكم هتونسونى
أوعى أخواتى يا أمى تختنيهم لأحسن بكرة يحصلونى
عارفة يا أمى أنك ندمتى بعد إيه ..
لا بكاكى ولا ندمك هيرجعونى
ابقى خلى يا أمى هدومى ذكرى
أوعى تغسليهم علشان يفكروكى بيوم وفاتى
ولأجل حكايتى تبقى عبرة للبنات والأمهات
لما تقوليلهم كيف لوم الناس والعادات اغتالونى
عايزة أقولك إن العفة يا أمى مش فى الختان
العفة أنكم ربيتونى
شعر المهندسة إيمان محمد على
ليست هناك تعليقات:
إرسال تعليق