……… … ..زي النسور……..
شعر/ خالد إبراهيم
شاعر وقلمي ع الورق
سطر سطور
من فرحتي بالنصر
يوم ما حققنا العبور
يوم ما انتقمنا لنفسنا
يوم ما عدينا الكنال زي النسور
قاعد في نص الليل وماسك بالقلم
زي السلاح
طلعت رصاصة م الألم
بتنادي حي علي الفلاح
"قوم يا مصري مصر دايما بتناديك
خد بنصري نصري دين واجب عليك"
تلميذ وماسك مسطرة
عمال اسطر من جديد
اسمك يا حتة سكرة
يا مصر نصرك مش بعيد
فنان وراسم قنبلة
فتحت طريق للانتصار
خلت ظلام الليل نهار
شقشق معاها الصبح ثاني
من جديد
من بعد ما دقنا مرارة الانتظار
جندي انا
جندي انا وبكل فخر
ومهنتي ومهمتي
احرس تراب الحرة مصر
شايل سلاحتي ومخلتي
ما يهمنيش الجو برد وألا حر
صيفي شتا وشتايا صيف
ما يهمنيش حجم الرغيف
كبير صغير. مش مهم
بس المهم ارض الوطن
احمي حماه ف الشدايد والمحن
واسمي وجيه.
شكلي وجيه
طبعي وجيه
لا انا ابن باشا ولا ابن بيه
وفصيلة الدم ف بطاقتي B
الأب مصر والأم مصر والجد مصر
وعمري ما حلمت اسكن في بيت
ولا حتي قصر
ساكن في خيمه ع الكنال
وهدومي ستره وبنطالون
منقوعة في مية جبل لون الرمال
وغطايه شمس تضمني
ما اعرفش غير كلمة سلاح
يلمع ف ضي الشمس
ما يهاب الرياح
ماسك بعيني ألف ترتيلة صباح
راسم علي جبيني جمال
ومن قبله صلاح
انا اللي عارف إن بعد الليل
نهار
وإن بعد النار عمار
وانا اللي شامم من بعيد
روايح الانتصار
وانا اللي شايف نور ف وسط
الانفجار
وانا يوم خدتش ع الهزيمه
والانكسار
علشان كده
مؤمن بنصر
مؤمن بمصر
من طلعة الفجرية
واقف ع الكنال
زادي وزوادي الامل
في النصر
واثق في فرج الله ونصر الله
كلي إيمان وعزيمه
ما لهاش حصر
واقف ومستني
صدور الأمر
طلع القمر يا اخوانا
عز الضهر
طلع القمر والمصري
عدا ومر
طلع القمر بعد المرار والمر
والعسكري ابن الميدان
راجع بنصر
شايل سلاحه بكل عزه وفخر
حالف ياإما الموت
يا إما النصر
دالمصري مؤمن بالإله
مؤمن بمصر
كل عام وأنتم بخير بمناسبة ذكري أنتصارات أكتوبر العظيم ١٩٧٣
مع تحياتي/ خالد إبراهيم
ليست هناك تعليقات:
إرسال تعليق