مش لاقى مفتتح القصيدة او عارف العنوان
مسكت قلبى القلم قام نعكش الاجران
طلع الحصاد ده رماد مافيهوش ولا قمحة
إزاى تنبت الفرحة والطمى بات حزنان
.....
النخل طاطى جريدة وقع الرطب فى البحر
والبحر ملحه زيادة والعطاشه كتير
طاب ليه يسمى الحزن وقت النحر؟
وهو اللى حالف يكسر جناح الطير
....
ازاى يا طيرى تغنى و صوتك ضعيف مبحوح
يا عاشق التغريد بأخر نفس فى الروح؟
محبوس حياتك فى القفص ممنوع من الطيران
وبجملة الاحزان فيك الامل مدبوح
....
باب النجاة مفتوح ولا انت مش شايف
من كتر حبسك فى القفص مرعوب
افرد جناحك طير وبلاش تكون خايف
لا يحصلوك بنشان او ياجى فيك الطوب
.........
يا مغنواتى بلاش تزيد كفة الاحزان
اسحب ايدين الشمس ابعدها ع الدخان
وبلاش تكمل لحن من البداية نشاذ
طاب ليه تحط الجاز ع النار تقول سكران؟
....
واوصف حنينى لواحدة ... عمرها ما حنت
مع انى عاشق ضيها ... قلبها جرانيت
لو قولت ابعد يومين الاقيها اتجنت
وان قولت اقرب تخلينى عبرة ف الحواديت
....
ما تقولى ليه يا نوح بنيت لنا سفينة
هتنقذ ايه او مين داحنا الطوفان لينا
ارحم كتير م العيشه لحد هذا الوقت
يموت فى قلبى الامان ويعيش الكره وسطينا
.....
ادم يا نازل م الجنان جايبنى ليه ع الارض
ده هى شجرة يتيمة ممنوعة مش اكتر
اذا كان ابو الكبير صعب عليه الشرط
ازاى ما بين ملايين هقدر وهتشطر.
..
مفيش فى ارضى زتون او فى حمام بيعيش
كل الكبار فى الحى معلمين تطنيش
شافوا سرب م الغربان نازل على دماغى
عامل دمايا حصير و اللحم لقمة عيش
.....
بصوا عليا وقالوا اوعاك فى يوم تنطق
اقبل تكون قصعة يتغدوا فيها الغرب
صرخت فيهم قولت انا م الجناب راح اطق
ازاى يا اهل الشرق تبيعونى لاهل الغرب
....
احمد فخري الاسواني
ليست هناك تعليقات:
إرسال تعليق