؛؛؛؛؛؛؛؛؛ دموع الرجال ؛؛؛؛؛؛؛؛
دموع الرجال
سر من الأسرار
جوهرة من البلار
واد من الأشعار
دموع الرجال
دمعة تساوي شلال
تحفر خندق ف الجبال
ْتْسَهَّرْ الليل وْمَا طال
دموع الرجال
قصة يحكيها جد لجد
نار كيتها ما تخمد
حريق جرحها ما يهمد
دموع الرجال
ما تْنْزْل غِيرْ ف السّْتْرَة
توخْزْ ف الْخَدْ كِيفْ اليْبْرَة
ما تْسْمَعْلْهَا أنين ولا نَبْرَة
دموع الرجال
مُوَشَّح ب أطول موال
جواب على ألف سؤال
دليل من بعدو ما تْسَال
دموع الرجال
تقول الضن خاب
حليب الحسرة راب
ميزان الصبر عاب
دموع الرجال
ف العشق راوية
ف الفرحة غالية
ف القهرة كاوية
دموع الرجال
عملة نادرة ما تاجر بها
يا ويل لي تسبب فيها
و كية اللي ما سالوا عليها
✍️يوسف التجاني
ليست هناك تعليقات:
إرسال تعليق