**** بياعين الكلام ****
اوعاك يوم تقولى
دول أحباب
لو كان حبهم صادق
ما كان لحظة غاب
الحب ما يعرفش غير
اللقا ولمة الاصحاب
وازاى اضحي بعمرى
وأفتح للحب باب
...............................
جوايا صرخة ألم
في القلب مكبوتة
حالنا أصبح عدم
نعمل منه حدوتة
عنوانها دنيا الهنا
وهى بالهم ملتوتة
...............................
يا بياعين الكلام
همس وغنا وحروف
للفرح نرصف طريق
وجوانا نزعة خوف
نرسم الضحكة صافية
والحزن فينا يطوف
نغني للحب مرة
والجرح نغني له ألوف
نوصف للأحبة الدوا
ودوانا مش معروف
...................................
فاتحين عيونا بعجب
لكن مش بنشوف
نجري ورا الألوان
تغطي وشوش وظروف
نخدع روحنا بايدينا
ونقول دا أصله عطوف
ولما نضل الطريق
يسكنا حزن وخوف
هو العيب فى العيون
والا القلب مكفوف
ملعون قلبي اللي حبك
وقال حبيب موصوف
.....................................
بقلم / مصطفي كرم
**** Mostafaa Karm ****
ليست هناك تعليقات:
إرسال تعليق