تباريح
=====
صوت الليالى فصيح
بس الأمل كداب
ريشه فى مهب الريح
ترسم دموع فى سراب
الصدق فيها جريح
ملفوف كما اللبلاب
للغش ميت تصريح
بحر النفاق غلاب
ترمى الشبك بيطيح
صايد جراح وعذاب
عاتبونى على التوضيح
عايزينها عتمه ضباب
توب الفضيله مريح
لونلبسه أحباب
توب الرزيله صفيح
يجرح قلوب أغراب
أما الشرف دا مليح
أصله من الأنساب
عمره فى يوم مايطيح
تصفى القلوب بعتاب
هى الحياه تباريح
لقمه واكلها غراب
بتصيده بالتفاريح
ماهو عيشته ويا كلاب
يرمى التهم تلميح
ينطق سواد لوعاب
واخد على التجنيح
مسدود طريقه بغاب
هاعيش حياتى صريح
عمرى ماكون دحلاب
لوجتتى فى ضريح
النور سابقها كتاب
فيه الخطاوى تصيح
صادق ومش مرتاب
موال حياتى مديح
الآهه نور فى سحاب
=====
بقلمى سامح توكل أبوالسبح
ليست هناك تعليقات:
إرسال تعليق