بدون أسباب
----------
بقلمي / عادل عبد الرازق
-----------------------
وشك مقطوع …
نص ليّا ونص ليكي
مجدول التقاطيع
بيكّب ملامح
وبدون تفاصيل
ومواسم غربة ف غناويكي ..
بتدمّع لسماعها عينيّا
إفردي كفك يمكن أفهم
يمكن أقدر أطلع للنور
عصفور من يومي ومسجون
ولا مرّة اتحنيت بحقيقة المحظور
من يومي …
وباطيّر في حمامة من قلبي إليكي
ترجع مكسورة
فكّي القفص السجن
فكّيني
وبعيد ارميني
على طرف حقيقتك من تاني
” شط اسكندرية
يا شط الهوا
رحنا اسكندرية
رمانا الهوا ”
والدوا ..
مرّ ومرير
وانا قلبي مجروح من خيانتك
من يوم ما عشقتك ..
بل من أول يوم فيها انا شوفتك
…إبعدي كفك عن كفي
كل احتمالات الرؤية سراب
راح تكدب شفايفنا
وغريب الليل مش حيلااقي الباب
…
إهرب ..
إبعد ,,
طير
ياقلبي
واوعى يخونك أي مصير
علّم نفسك تبدأ
من غير أي هزيمة
يا قلبي ولا تتعب نفسك بالذكرى
واعرف إن الفجر..
عمره ما أخطأ عنوان الباب
…
كدبت ضفايرك من أول لؤا كان بينا
خدعتني الطفلة واتاريها شيطان
وآه …
ألف آه يا قلبي من ضيق المكان
بيزمّ على ضلوعك
ولا متحمّل زيك إنسان
حبيتا يا مسكين واتاريها
كان عشقها كداب كداب كداب
…
إتبعتر ..
إتنتوّر ..
واتعفّر بتراب الشارع والحاره
ما هو ذنبك إنك صدقت كلامها
قلتلها بحبك ..
قالتلك الوداع .. وبدون أسباب
*******************
ليست هناك تعليقات:
إرسال تعليق