إعتراف
(#* زينب سالم )
إسمحوا لي أقول للعمر اللي راح
ندمانة بجد على كتير ماللي راح
كان بجد نفسي بالي يرتاح
عمر مشي ازاي ما اعرفش
عمر جري و القلب ما ارتحش
ايام جرت شهور و سنين
ايه اللي باقي غير الحنين
حنين لذكرى طفولة بعيدة بعيدة
حنين لبيوت لشوارع وحيدة
كنت باشوفه دايما قاعد هناك
من صغر سني كنت بأهواك
فرق بينا سنين و كمان طول
قد ركبتك كنت و مش هأطول
كانت عينيك بتناديني بلمعة
إيديك تسلم و انا مش سامعة
اول ما بدأت اكون فتية
سافرت و رجعت كنت مستخبية
كنت لغيرك وقتها مستنية
لحد ما لقيتك بتنادي يا صبية
آه كبرت الصبية من غيرك
كبرت و راحت كمان لغيرك
راجع ترجع مشاعر تاهت
جاي تقول قلبك ساكت
فين كان لسانك قبل ما تسافر
ليه ما قولت انك مهاجر
يا ريتك وعدت كنت استنيت
يا ريت اخدت قلبي و جيت
فضل وجع نظرات عينيك
يوم زفافي قلبي يناديك
كان سرك جوايا ودي اخبيك
لكن الوداع يا فكرة حلوة
الوداع و الألم صبح شكوة
حكايتنا جوايا غنوة
بتصبرني على ايام مش حلوة
اعترف لك اني ما نسيتك
يا رضا دنيتي استنيتك
لكن القدر قدر خطاوي بعدتنا
و الايام جريت و اخدتنا
فينك قوللي و فين دنيتنا ودتنا
حتى لو شوفتك و شوفتني
تفتكر هنرجع يوم حكايتنا
اعتراف
كلمات/ زينب سالم *#
٢٠١٨/١٢/٣٠
ليست هناك تعليقات:
إرسال تعليق