امي ياحبي الحقيقي/كلمات الشاعرة /سماح عبد الفتاح

أمى يا حبى الحقيقى ..

أمى يا نبع الحنان..

يا هدية من السما..

يا هبة من الرحمن..

حبك مخلوق جوايا .. من قبل ما اتولد .. من قبل الزمان بزمان..

تقسا عليا الدنيا..

والفرح ينسانى..

ولما اليأس يشد حيله ويعشش جوايا..

صوتك وحضنك الدافى .. ياخد بإيدى وأرجع أقف وأكمل حياتى من تانى..

أمى يا حبى الحقيقى..

أمى يا نبع الحنان ..

****

صبرك على الأيام ..

وهمس صوتك فى جوف الليل ..

وأنين رجائك.. وايدك المرفوعة ديماً بالدعاء..

وتوسلك لربنا يوفقنا وما يخيب لنا أبداً رجاء ..

هو اللى علمنى وربانى .. وخلانى اتحدا كل الأحزان..

ما انتى قدوتى .. وحبيبتى وأختى وصحبتى..

يا تاج راسى يا عزوتى وناسى ... تسوى أيه الدنيا بدونك.. ما انتى سر الحياة

أمى يا حبى الحقيقى ..

أمى يا نبع الحنان..

****

ياما ضحيتى  براحتك وصحتك .. ياما اتحملتى وصبرتى

واتحرمتى من متع الحياة ..

ادتينا من عمرك سنين وسنين .. ولا فرق معاك 

كان كل همك نعيش مرتاحين .. متعلمين متنورين ..

سلحتينا بالعلم ... والحلم ..

وصلتينا بعزيمتك لبر الأمان ..

أمى يا حبى الحقيقى ..

أمى يا نبع الحنان ..

****

صوتك فى الدنيا مدفينى..

وقلبك الطيب بيحسسنى بوجودى كإنسان..

مُثل كتير وقيم زرعتيها جوانا وأهمها العطاء والتضحية..

خلتينا نميز الحلال من الحرام .. الصدق من الكذب .. الصح من الغلط..

عرفتينى يا أمى إن الإنسان مش بجنسه ولا هويته ... الإنسان بإنسانيته..

بأخلاقه وتربيته وده أحسن عنوان.. 

قولتى لى الدنيا مش غابة..

فيها أغنيا وغلابة ..التزمى بدينك يا بنتى خلى سلوكك حتى ولو آية..

آية واحدة من القرآن تكفيك شر الأيام..

بدعى ربنا يا أمى فى ركوعى وسجودى.. يقدرنى أعوضك عن كل سنين الحرمان..

ما أنا ربى وصانى .. وأرشدنى وهدانى ... إن سر النجاة فى حياتنا هو:

وبالوالدين إحسان ...

أمى يا حبى الحقيقى ..

أمى يا نبع الحنان ..

(مسابقة عيد الأم)

بقلم / سماح عبد الفتاح