امتى يامه تنوري بوشك
حلمي الكئيب..
امتى جرحي اللي اتسع
من بعد انفاسك يطيب
انتي كنتي المبتدا
وانتي كنتي المنتهي
كنتي انا
دلوقتي هنا
عايش أنا
من بعد أحضانك غريب
امتى يامه تنوري روحي الكئيبة
ياللي كانت بسمتك بتشع طيبة
امتى اشوفك
والتقى روحي الحبيبة
أناكنت عايش كالأمير
وجوه قلبك مملكه
ارفرف بأحلامي واطير
مايحدنيش اي فضا
ماهو أصل في القلب الكبير
مفيش حدود ولا فيه مدي
دلوقتي عايش كالسراب
وقلبي مخنوق م العطش
كنت بغزل شوقي ليكي في كلمتين
وابعتهم على جناح الحنين
يبعتلي قلبك الف نبضة
ومن شفايفك
الف دعوة حنينه
تطبطب على قلبي الصغير
وتزرع جوه منه البسمله
احس ان الكون ده لوحه
وانتي فيها الملهمه
دلوقتي عايش كالسجين
وجوا قلبي محكمه
دلوقتي بدفن اغنياتي
تحت أطلال الألم
وأفضل اطبطب فوق شفايفي
لأجل ترضى تبتسم
مين اللي قال إن ابتسامتي
معنى مناقض للشجن
مين اللي يعرف طعم حزني
غير اللي شارب م الألم
مين اللي قال ان قلبك
ماهوش مرادف للوطن
قلبك هيفضل رغم بعدك
نبض سارح في المدن
ولو المدن ممكن تموت
قلبي انا
هو الكفن
"ياسر الغرياني "
ليست هناك تعليقات:
إرسال تعليق