قلبي يحبك
إلي شقيقي الأصغر المهندس محمد علي
من يوم ما وعيت ع الدنيا
وقلبي يحبك
ويحب الحب عشانك
اسمك منقوش جواية
بحبر مودة
وحروف من نور ملضومة
بخيط الرحمة
يا محمد يا ابن أبويا وأمي
مشتاقلك أكتر من أشواقك ليا
مشتاق لإديك لما بتحضنها إيديا
وتطبطب علي أحزاني
وتمسح دمعي
مشتاق لسماع صوت الكروان
من صوتك
لما تقولي ألو
تليفونك دايما بيطمني
ما تبطل بخل يا ميدو
وقوم كلمني
وحيات النعمة وحشني
لولا إني مريض
وآلامي تعبت مني
كنت أنا كلمتك
أو جيتلك لجل ما أملي عنيا
بشوفتك
طمني عليك واطبع
ع الخد سلامي
لحبيبة قلبي (يمني)
وبنتي حبيبتي(حبيبة)
وكمان سلملي يا ميدو عليك
طمني
علشان وحيات النعمة
بحبك أكتر مني
ليست هناك تعليقات:
إرسال تعليق